حنعمل ابه فى رمضان

رمضاااااااااااااااااااااااااااااان كرييييييييييييييييييييييييييييييييييييييم

رمضان باقى عليه 3 تيام على رمضان
الكل بيستعد
بالياميش طبعاااااااااااا
و الأكل اللذيبببببببببذ
و المسلسلات و البرامج
أوعوا تنسوا البرامج
أصلنا ناوينا فى رمضان
نحى ليله بالمسلسلات
أوعوا تطنشوا المسلسلات أحسن فعلا تندموا
ايه شكلكوا مش موافقنى الرأى و لا إيه
لأ أزعل منكوا
لا مش أنا و بش لكن شوشو كمان حيزعل منكوا
و طبعا إحنا مبنحبش نزعله
و خصوصا انه حيتحبس 30 يوم يعنى لازم نقوم بعمله فى غيابه محنا لازم نساعد بعض ياجماعه

تخيلوا ده حال المسلمين فى رمضان
ياناس مفيش حد ياخد بإدنا علشان نصوم صوم بجد
و نقيم الليل و نصلى التراويح
ايه إلا جرى فى الإعلام ده كأن كل الفسق منتظر رمضان
طب ليه
مش عارفه أجاوب
جاوبوا إنتوا بقى

الثانويه العامه

شوفوا شوفوا

امبارح كان إمتحان ثالثه ثانوى

ذهبت مع ابنى إلى المدرسه الإ حيمتحن فيها و نظرا لبعد المدرسه عن البيت بحوالى ساعه إلا ربع بالعربيه دون إشارات أو أزمه مرور

فضلت أنى أستنه الغالى لحد لما يخلص و أخده و نروح بدل المشوره

لقيت عدد كبير من الأمهات قاعده على باب المدرسه و دموعهم على خدهم تقولوش العيال داخله تعمل عمليه اللوز مثلا

المهم قعدت فى عربيتى و الشمش ضاربه فيا أعدد الثوانى قبل الدقائق و الأمهات بقى نازلين رغى و إلا بتعيط و إلا نتتضرع إلى الله أن ينجى إنبها من الكارثه ألا و هى إمتحان العربى

و الحمد لله خلصوا الثلاث ساعات و أنا على هذا الحال

و جاءوا الأولاد كأنهم مساجين يكلمونا من وراء باب المدرسه فغير مسموح لهم بالخروج أو احنا ندخل

عملتوا ايه

الإمتحان جميل ده هما إلا بيقولوا طيب الأمهات إستريحت و هدأت و دخل الأولاد يمتحنوا ماده الدين

لقيت الوضع إتغير خالللللص

متعرفوش الأمهات لمت نفسها إزاى و قعدوا فى الجنينه التى أمام المدرسع و تقولوش إننا فى رحله الأكل طلع و الشاى طلع و الضحك طلع

هو فى إيه هو أنتم طالعين رحله و لا أيه و لسه ياما نشوف العجب من الثانويه العامه و من الأهالى

دى حاجه تجنن

يا مدارس يا مدارس

شوفتوا المدارس و الأ بتعملوا فينا أهى دى المدارس و لا بلاش

لآخر ما تفتق عنه ذهن المدرسين و القائمين على التعليم

طبعا مش حتصدقوا

تصورا بيمضوا الأولاد على ورق يفيد أنهم أخذوا كل المنهج و إنشرح لهم على أكمل وجه

هل تصدقوا هذا اطفال فى العقد الأول و الثانى من عمرهم يمضوا على أنهم إنشرح لهم كل المناهج

و هل يدرك الأطفال ما يحدث لهم و هل بهذه الطريقه يخلى المدرس ذمته أما المسئولين

طيب إزاى حيخلى ذمته أمام الله

بذمتكوا إيه رايكم فى ما يحدث مع الأطفال

أنا أتذكر زماااااااااان مش زمان قوى يعنى

كان المدرس بيشرح و يعيد و يزيد و يراجع فى الفصل و بيهتموا بكل تلميذ فى الحصه

و بدون الحاجه إلى إمضاءات كان المنهج بيشرح بالكامل

لكن أقول أيه

لا حول و لا قوة إلا بالله لعلى العظيم

هذا يحدث و فى مدارس حكومه

الخلع

اصبحت السيدات الآن يمتلكن حق خلع الرجاله

و لكن هناك سيدات يشربن من كأس المر و الهوان و لا نجدهن يفكرن مجرد تفكير فى الخلع

و البعض الخر يطلبن الخلع لسباب قد تكون تافه أو ممكن علاجها او تحملها مثل واحده تطلب الخلع لأن رائحه قدم زوجا لا تعجبها أو لنه بينام مبكرا أو مبيحبش الرغى كثير

يعنى كل ست و وجه نظرها هى حره فى جوزها إن شاءت خلعته و إن شاءت ابقت عليه

لمن لماذا واحده تطلب الخلع و اخرى تتحمل الذهل و الهوان و لا تفكر مجرد تفكير فى الخلع

هل الحاله الماديه التى وصلت لها المرأه الأن و كونها نتعمل و لها حساب خاص جعلها تتصرع فى طلب الخلع

يعنى هل مسألة الخلع بتتوقف على الحاله الماديه للزوجه

أم إنها بتطلب الخلع حتى لو كلتها بدقه

بصراحع اصبحت أرى طلبات الخلع بتزيد يوم ورا يوم

ماذا بعد الممات

أعتمد على نفسك و لا تنسى آخرتك

حاولت كثيرا أن أعتمد على غيرى فلم أحظ بالنتائج المرجوه و كثيرا ما أصاب بالإحباط

فسرحت بتفكيرى كيف لى أن أعتمد عليهم فى دخولى الجنه كيف أثق بالأخرين قد تأخذهم مشاغل الحياه عن مجرد التفكير فى بعد مماتى فتوصلت إلى نتيجه أرحتنى بعض الشئ و قلت لنفسى لا يوجد أفضل من المثل القائل "لا يحك جلدك إلا ظفرك "

و من هنا قلت لا بد من الإعتماد على أظافرى أى الإعتماد على نفسى حتى لا أصاب بالندم و الحسره فكرت

كيف أعتمد على نفسى فى دخولى الجنه كيف أعتمد على نفسى فى عمل صالح يعود لى بالخير بعد مماتى .....لا يوجد إلا الصدقه فلماذا نبخل على أنفسنا و لا نفكر فى الصدقه الجاريه نفكر فقط كيف نترك لأولادنا المال الوفير و لانفكر فى أنفسنا بعد مماتنا

لذا قم واعمل صدقة جارية بنفسك قبل رحيلك عن هذه الدنيا وسوف تستمر كمصدر حسنات لك وقد تساعدك على دخول الجنة وبعدك عن نار جهنم.

قال رسول الله صلى الله عليه و سلم
إذا مات ابن آدم إنقطع عمله إلا من ثلاث : صدقة جارية أو علم ينتفع به أو ولد صالح يدعو له

أنواع الصدقات الجاريه كثيره و لكنها تتوه منا الأفكار فى أحيان كثيره

فهل نذكر بعضنا البعض بأنواع الصدقات الجاريه كى نكون عوننا لبعضنا البعض فى الخير

لا يوجد مسلمين

شوفتوا البلد التى بتفتخر إنها ليس بها مسلمين

إنها أرمينيا

و هى إحدى جمهوريات الإتحاد السوفيتى سابقا

فالنصرانيه هو دينها و يشكل عدد المعتنقين له 93% و 5 إلى 6% يعتنقوم الديانه اليزيديه التى يعتنقها الأكراد الذين يتواجدون فى المرتفعات الغربيه أما اليهود فهم حوالى 750 نسمه رغم أنها خضعت لفتره طويله لسيطرة العرب إبان الدوله الأمويه

كان عندها أحدث الصناعات حتى صناعة السلحه و لكنها هجرت جميع أنواع الصناعه و أصبحت تعتمد على الإستيراد فى كل شى و لكنها تعد بلد زراعى

نور الفجر

قرأت لأختى الحبيبه نور الفجر عباره إستوقفتنى أمامها برهه من الوقت

كأن عقلى توقف لحظه و لم يعد قادرا على التفكير

فنحن نجرى فى سباق طول حياتنا علشان العيال و البيت و الراجل و الشغل

و وووووووو بلا توقف أو حتى مجرد تفكير فيما نفعل

فقرأت لها عباره بتقول فيها


"انا شخصيا اعشق حريتى فى اعتقالى بسجون احبابى"

فالبيت بتجرى و تلف فيه زى الساقيه كأنها محكوم عليها بالأشغال الشاقه و تلهث و راء

طلبات الأولاد و رغباتهم كأنها الخادمه المطيعه


و الزوج ياطول طلباته و ياليته بيساعد بل العكس بيزيد من الأعباء


أما الشغل فحدث و لاحرج


و فى النهايه إستخلصت أختى كل هذا الكلام فى عباره و احده و هى

"انا شخصيا اعشق حريتى فى اعتقالى بسجون احبابى"

كم نحن أيها السيدات غلابه ورغم ذلك بنعشق هذا الغلب

أطفال الشوارع

النهارده مسيطره عليه فكره أطفال الشوارع مش عارفه ليه

جايز لأنى بأرى النقيضين كل يوم

أجد أطفال فى غايه الترفيه و أطفال يشحتون فى الشوارع اللقمه الجافه

قد نقول كل بيواجه قدره

لكن من المسئول عن هؤلاء الأطفال هلى آبائهم و أمهاتهم فقط أم المجتمع بأسره أين

دور الأغنياء مع هؤلاء الأطفال لماذا لا يقدموا لهم المساعدات و يبنوا لهم الدور التى

يقيمون بها بدلا من نومهم فى الشوارع و تحت الكبارى

بدلا من تهديدهم للرايح و الجاى طبعا يهددوهم لأنهم جياع و محرومون و معقدون نفسيا

أنهم فنبله موقوته إذا لم يجد المجتمع حل جذرى لهم سيكونوا وباء على المجتمع

إنهارده أجازه

صحيت النهارده من النوم كسلانه جداااااا

قلت بلاش تروحى الشغل أقعدى النهارده ايه يعنى أهو يوم واحد فى الأسبوع تاخديه أجازه مش مهم

و قعدت وقلت يارب الأولاد ميصحوش بدرى علشان أخد راحتى فى الجلوس بمفردى الذى لا أناله كثيرا

و فعلا مشيت على أطراف أصابعى و تحركت بهدوء فى البيت منا خايف بقى و شربت الشاى بلبن مع القراقيش و شعرت بانتعاش غريب

و قلت بس اقعد معاكوا شويه

وقلت أحكى لكم حكايه النص و النص

النص رقيب على النص الثانى

هذا هو الحال فى الشغل الأمن مشغل نصف الموظفين رقباء على النص الأخر تشعرى إنك

فى الشغل محسوب عليكى النفس و أى كلمة لازم تحسبى لها الف حساب و إلا العقاب شديد

هل تصدقون هذا أم أن هذا الوضع فى جميع المؤسسات

لكن أقول لكم الحق بدات اكتشف النص الرقيب واحد تلو الأخر أصلهم باينين دائما يطرحوا

اسئله توقعك فى الغلط أو تجدهم صامتين و كلهم آذان صاغيه و يارتهم بينقلوا الصوره صح

لكن أعوذ بالله من الذواق و الملح و البهارات التى ترش على أى موضوع

بصراحة قرفت جدا مش عارفه أعمل ايه

ياترى عندكم حل ....

أوعوا تقولولى سيبى الشغل و أقعدى فى البيت أصلى بمل من قعدة البيت جداااااا

اليوم عيد الأم

لقد تصادف أن أعمل مدونتى هذه يوم عيد الأم لا أعلم الحكمه لكنها هى هكذا

فى هذا اليوم أقدم و رده إلى كل أم ربت و تعبت و أنشات جيل صالح له مبادئ و قيم يحافظ عليها جيل لديه وعى بما يدور من حوله

و عذرا لن اقدم هذه الورده لمن تدعى الأمومه و تركت أولادها ريشه فى مهب الريح لم تتركهم أقوياء فى هذا الزمن لم تحصنهم بالدين .

و لكى منى يا أمى أعذب الكلمات و أدعو لك بالشفاء و الصبر عسى ربى أن يرزقك بجنه الفردوس و أن تصحبينا معك لكى نبقى صحبه طيبه كما نحن الآن بارك الله فيك أمى

كلنا بشر

السلام عليكم ورحمة الله و بركاته

أصدقائى هذه مدونتى لقد أخترت لها إسم كلنا بشر
لأن كلمة البشر تحمل معانى كثيره
لما نفرح نحن بشر , لما نغضب فنحن بشر
لما تتوالد لدينا أحاسيس متناقضه فنحن بشر

لما نخطئ فنحن بشر و لما نتوب فنحن بشر و لما نعاود الخطأ فنحن يشر

فندعو رب البشر أن يعفو عنا

فكلمة بشر تجمع بين كثير من الصفات الجميله و المتناقضه فى نفس الوقت